បណ្តាញស្ថានីយ៍ទូរទស្សន៍ CBS ដែលមាន CTN, MyTV និង CNC បានបកស្រាយចម្ងល់ដល់បងប្អូនប្រជាពលរដ្ឋខ្មែរ ដែលស្នេហាវិស័យបាល់ទាត់ ពីមូលហេតុដែលទូរទស្សន៍មួយនេះ មិនព្រមផ្សាយបន្តផ្ទាល់បាល់ទាត់ UEFA Champions League, UEFA Europa League និង English Premier League នៅលើទំព័រ Facebook របស់ CBS SPORT។
រដូវកាលថ្មីនេះបណ្តាញស្ថានីយ៍ទូរទស្សន៍ CTN, MyTV និង CNC បានផ្សាយបន្តផ្ទាល់បាល់ទាត់ Premier League ជារៀងរាល់ថ្ងៃសៅរ៍ និងថ្ងៃអាទិត្យ រួមទាំងផ្សាយបន្តផ្ទាល់ UEFA Champions League និង UEFA Europa League ១គូៗក្នុង១យប់ផងដែរ លើកញ្ចក់ទូរទស្សន៍ ប៉ុន្តែអ្នកទស្សនានៅកម្ពុជាជាច្រើនចង់ឲ្យមានការផ្សាយបន្តផ្ទាល់លើ Facebook Page ទៀត ដើម្បីងាយស្រួលតាមដាន ព្រោះអ្នកខ្លះពុំមានទូរទស្សន៍នោះទេ។
យ៉ាងណាក្តី បើតាមលោក ស៊ីថូ ណាថាន់ ពិធីករកីឡាដ៏ល្បីរបស់ស្ថានីយ៍ទូរទស្សន៍ CBS បានបញ្ជាក់កាលពីយប់មិញថា ក្រុមការងាររបស់លោក ក៏ចង់ផ្សាយបន្តផ្ទាល់លើ Facebook ដើម្បីចែកជូនបងប្អូនបានទស្សនាងាយស្រួលផងដែរ ប៉ុន្តែដោយសារកិច្ចសន្យា គេពុំអនុញ្ញាតឲ្យផ្សាយបន្តផ្ទាល់លើ Facebook នោះទេ ដូច្នេះហើយទើបមិនអាចធ្វើទៅបាន។
ចំពោះការដែល CBS មិនផ្សាយក្របខណ្ឌលីគកំពូលអេស្ប៉ាញ La Liga រដូវកាលនេះ លោក ណាថាន់ បានបន្ថែមថា គឺទាក់ទងនឹងចប់កុងត្រាជាមួយអ្នកឧបត្ថម្ភ (Sponsor) និងចប់កុងត្រាជាមួយ La Liga ផងដែរ។ ហើយការចង់ផ្សាយក្របខណ្ឌណាមួយ មិនមែនចេះតែនឹកឃើញផ្សាយនោះទេ ពោលគឺទាមទា លើការចរចាលក្ខខណ្ឌកុងត្រារវាងភាគី៣គឺ CBS, អ្នក Sponsors និង La Liga ទៀតផង៕
ប្រភព ដំណឹងថ្ងៃនេះ
Post a Comment